Politika -
Egiaztatze Batzordea
Alde guztiei pauso berriak emateko eskatu die Egiaztatzaileen taldeak
Nazioarteko Egiaztatzaileen Batzordeak baieztatu du ETAk bere konpromisoei eusten diela eta bake-prozesuak aurrera egiteko "alde guztiei" urrats berriak emateko eskaera luzatu die.
Erredakzioa
Nazioarteko Egiaztatze Batzordea "pozik" dago "ETAk betetako konpromisoekin". "Bakea finkatzeko pauso gehiago egongo dira", horien ustez, eta, ildo horretan, "baikor" azaldu dira. Hala ere, pauso horiek, konfiantza ematen laguntzeko, lehenbailehen eman behar direla zehaztu dute.
Hiru eguneko bisitaren amaieran egin duten bileran, Ram Manikkalingam buru duen nazioarteko egiaztatzaileen taldeak mezu hau helarazi du alderdi politikoekin, gizarte eragileekin eta "ETArekin kontaktuak" izan ostean.
ETAk su-etenaren amaiera iragarri zuenean harturiko konpromisoak betetzen jarraitzen duela nabarmendu dute.
Taldeak esan duenez, Euskal Herriko kontaktuen bidez "hilketak, atentatuak, lehergailuak, erasoak, mehatxuak eta estortsioa" amaitu direla egiaztatu dute.
Hala ere, "ETAk konpromisoak betetzen jarraitu duen arren, gauza garrantzitsu batzuk hobetzeko" lanari eutsiko diotela gaineratu dute.
Gizartean, bakea finkatzeko pauso berriak hartzeko itxaropen handiak daudela frogatu dutela nabarmendu dute. "Alde guztiei pauso berriekin jarraitzeko deia egiten diegu, bakea finkatzeko eta konfiantza sortzeko", azpimarratu dute testuan.
Legebiltzarrarekiko "konfiantza osoa" azaldu dute eta Bake eta Elkarbizitza Lantaldeak "alde guztien arteko elkarrizketan laguntzea" espero dute.
"Behin betiko bakea lortzeko aukera historiko honetan laguntzeko", "harremanekin jarraitzeko nahia" azaldu dute, eta, "inpartzialtasunez" lanean jarraituko dutela berretsi dute.
