EH Bilduk ez du azaldu Mikel Agirreren alde ala aurka egingo duen

EH Bilduk EITBko zuzendari berria hautatzeko EAJren eta PSE-EEren arteko akordioa kritikatu du, "edukia" falta zaiolako eta irrati telebista publikoaren "ereduari" buruzko eztabaida hartzen ez duelako. Halaber, paktua Eusko Jaurlaritzak Aurrekontuak onartzeko babesa lortzeko testuinguruan jarri du.

Laura Mintegi eta Unai Urruzuno koalizio abertzaleko legebiltzarkideek Mikel Agirreren hautaketa bermatzen duen sozialisten eta jeltzaleen arteko akordioa kritikatu dute, prentsaurreko batean, Legebiltzarrean.

Mintegik paktua “izenei” mugatzea deitoratu du, eta horrek euskal irrati telebista publikoaren “ereduari” eta helburuei buruz ez duela hitz egiten nabarmendu du.

EH Bilduko bozeramailearen ustez, akordioak "eduki" falta du, eta bi alderdiek EiTBk zerbitzu publikoan izan behar duen paperari buruzko eztabaida euren gain ez hartzeari ematen dioten "inportantzia txikia" deitoratu du.

Mintegiren hitzetan, erakundeak misio garrantzitsua du kohesioaren ikuspuntutik, "lurraldetasunean" eta euskarak eta euskal kulturak duten tratamenduan, ondorioz, gai horiei buruzko atentzio falta nabaritu du jeltzaleen eta sozialisten aldetik. Mintegik azaldu du bere alderdiak oraindik ez duela erabaki bere botoa zein izango den Agirreren hautagaitzari buruz egingo den osoko bilkuran.