Guardia Zibila eta Polizia EAEtik joateko eskatuko du Jaurlaritzak

Estefania Beltran de Heredia Segurtasun sailburuak iragarri duenez, Estatuko Segurtasun Indarrak EAEtik ateratzea eskatuko dio Espainiako Gobernuari "irmotasunez", ETAk armak uztea erabaki izana horretarako "egoera aproposa" delakoan.

Segurtasun sailburuak agerraldia egin du Eusko Legebiltzarreko batzorde batean, datozen lau urteetarako dituen helburuak jakinarazteko.

Azaldu duenez, Sailaren izen aldaketak (lehen Herrizaingo Saila zen) agerian uzten ditu "politika publiko berrien helburuak, ETAk jarduera armatua atzean utzi ondoren".

Hori dela eta, Ertzaintza "sortu zeneko izaerara" itzultzea eta "herritarrekiko gertutasuna berreskuratzea" aldarrikatu du.