Aralar: 'Bakea lortzeko, Euskal Herria ez da Gobernuen zain egongo'

Mariano Rajoyren Gobernuak bakearen gainean duen "eztabaidarako itxiera" salatu du Patxi Zabaleta Aralarreko koordinatzaile nagusiak. "Euskal Herria ez da Espainiako eta Frantziako ekintzen zain egongo", iragarri du Zabaletak.

Halaber, bakea lortzeko hainbat mugimendu sozial eta politiko abiatu dituzte, baita presoen kolektiboaren barnean ere, azaldu du Aralarreko buruak. "Ez dira Madrilgo Gobernuaren zain egongo, urtebete igaro delako eta bakea lortzeko ekarpenik egin ez dituelako", deitoratu du.

Igande honetan Gasteizko Europa jauregian egin du Aralarrek batzar nagusia. Ondoren, "eztabaidetan bakeak leku garrantzitsua" duela onartu du Zabaletak komunikabideen aurrean egindako agerraldian.

Zabaletak salatu duenez, Madrilgo Gobernuak "ez du proposamenik eta ez du konpromisorik hartu nahi". "Argi dago ezin dugula jarrera-aldaketen zain egon, haiek hartutako jarrera honek mozkin politikoak lortzea duelako helburu, Mayor Orejaren garaietan bezala", esan du.