Politika -
Elkarrizketa Sud Ouest-en
Otegi: 'Aukera posible bakarra ETAren desegitea da'
Era berean, Arnaldo Otegik uste du nazioarteko komunitateak bake-prozesuan parte hartu behar duela eta ETAko presoen aurkako sakabanaketa politika amaitu egin behar dela.
Erredakzioa
Arnaldo Otegik uste du “aukera posible eta desiragarri bakarra ETAren egitura militarraren desegitea” dela. Hala adierazi du Sud Ouest egunkariak gaur argitaratutako elkarrizketan.
Era berean, ezker abertzaleko buruzagi ohiak dio “nazioarteko komunitateak desmilitarizatze prozesua hori ikuskatu” egin behar duela eta Frantziako Gobernuak bake-prozesuan “paper garrantzitsua” joka dezakeela.
Otegik nabarmendu du ETAren indarkeria “betirako” amaitu dela eta Espainiako Gobernuak agertoki berriari “izua” diola. Ildo horretan, bake-prozesua aurrera egitea ahalbidetzeko Frantziak “malgutasun nahikoa” badaukala erantsi du.
Bestalde, euskal presoen aurkako sakabanaketa-politikari amaiera eman behar zaiola eta gaixotasun larriak dituzten presoak kaleratu egin behar direla adierazi du.
Egun, Otegi Logroñoko espetxean dago preso.
