Egiaztatzaileek diote 'oso zail' egiten ari zaiela desarmean laguntzea

ETAren desarmerako Nazioarteko Egiaztatze Batzordearen arabera, ez da astirik galdu behar "armak erabili ezinik uzteko prozesuaren lehen urratsa nola egin zen eta zenbat arma izan ziren" eztabaidatzen, horrela "azken helburua ahaztu" egiten baita. Izan ere, "lehenengo aldiz 50 urtetan, ETAk armak erabili ezinik uzteko konpromisoa hartu" izana azpimarratu du.

Horren harira, Egiaztatze Batzordeak agiria kaleratu du goizaldean, eta "ETAk armak erabili ezinik utziko dituela ziurtatzeko aukera paregabea" dagoela adierazi du.

Bestalde, egiaztatzaileen jazarpen judiziala salatu dute, horrela "oso zaila, ia ezinezkoa" egiten zaielako "ETAk adierazi zigun asmoan laguntzea", hau da, arma guztiak erabili ezinik uzteko prozesuan laguntzea.

Hala, beste inon ez omen da gertatu ETA bezalako erakunde batek desarmatzeko erabakia hartu eta "erakunde guztien oniritzia jaso ez izana".

Horregatik, deia egin die "gobernuei, buruzagi politikoei eta herritarrei", ETAk "arma guztiak erabili ezinik uzteko prozesuak aurrera jarraitzen duela ziurtatzeko modua zehaztu behar ote den" erabaki dezaten.