1976ko Martxoak 3 -
41. urteurrena
Martxoaren 3ko biktimentzat justizia eskatu dute milaka lagunek
19:00etan hasi da manifestazioa, Zaramaga auzoko Martxoak 3 plazan. Goizean, lore-eskaintza egin diete haien omenez jarritako monolitoan.
Agentziak | Erredakzioa
Ostiral honetan milaka pertsona bildu dira Gasteizen, 1976ko martxoaren 3ko sarraskiaren biktimentzat justizia eskatzeko. Halaber, polizia-karga baten ondorioz hildako bost langileak omendu dituzte 41. urteurrenean.
19:00etan hasi da manifestazioa, Zaramaga auzoko Martxoak 3 plazan. ELA, LAB, ESK eta Steilas sindikatuek antolatutako manifestazioa baino lehen, lore-eskaintza egin diete haien omenez jarritako monolitoan. Bertan, terrorismoaren biktimatzat hartzea eskatu diote Espainiako Gobernuari.
1976ko martxoaren 3an hildako bost langileen omenez egindako ekitaldian langile guztiei luzatu dieten adierazpen bat irakurri dute.
Eva Barroso Martxoak 3 elkarteko bozeramaileak azpimarratu duenez, duela 41 urte gertatu zena “langileen kontra egindako sarraskia” izan zen.
Hala, polizia-karga baten ondorioz hildako bost langileen izenak irakurri dituztenean pertsona guztiak txaloka hasi dira. Era berean, Tarragonan eta Basaurin hildako bi pertsonak gogoratu dituzte.
Beste alde batetik, Gorka Urtaran Gasteizko alkateak Mariano Rajoy Espainiako Gobernuko presidentearekin bilera egitea eskatu du. Hala, justizia egiteko eta duintasuna erreparatzeko, biktimengatik barkamena eskatu dezan exijitu dio Urtaranek.
