Juanfran (Osasuna-Real Madril): "Gerra eman asmoz goaz Bernabeura"

Partida berezia da igandekoa Juanfranentzat. Osasunako erdilaria Real Madrilen harrobitik irtendako jokalaria da, eta argi dago Real Madrilek Bartzelonarekin duen lehian madrildarren alde dagoela Juanfran, baina hala eta guztiz ere Santiago Bernabeun irabazi egin nahi du Osasunako jokalariak: "Gure porrota segurutzat jotzen du mudnu guztiak eta hori ez zait batere gustatzen. Gerra emateko asmoz goaz gu Bernabeura. Apustuak gure kontra izango dira nabarmen, baina partida jokatu egin behar da", esan du Juanfranek gaur Taxoaren.

Golen bat egitea lortuz gero, inolako arazorik gabe ospatu egingo duela ere adierazi du Osasunako eskuin hegaleko erdilariak: "Gola eginez gero ospatu egingo dut, noski. Real Madrili egundoko begirunea eta maitasuna diot, baina une honetan Osasunako jokalaria naiz erabat", esan du jokalari gorritxoak.