Mundua -
Beste tiroketa bat AEB-etan
Zazpi pertsona hil dituzte Oaklandeko unibertsitate kristau batean
Poliziak susmagarri bat atxilotu du, tiroketarekin zerikusirik duelakoan.
Erredakzioa
Zazpi pertsona hil dira eta hiru zauritu astelehen honetan Oaklandeko (Kalifornia, AEBak) unibertsitate kristau batean jazotako tiroketa batean, azken balantze ofizialaren arabera.
Poliziak 40 urteko gizonezko asiar bat atxilotu du, hilketekin zerikusirik izan dezakeelakoan, baina oraindik ez dio egotzi egilea izatea, Johanna Watson Poliziaren bozeramaileak azaldu duenez.
SWAT indar bereziak unibertsitatera bertaratu dira, susmagarri gehiago bilatzeko. "Lekukoekin hitz egiten ari gara, pertsona hau [atxilotutakoa] ezagutzen duten argitzeko", esan du bozeramaile batek.
Tiroketa 10:30ean (18:30 Euskadin) jazo zen, Lucas Garcia ingeles irakasleak zehaztu duenez.
Lekuko horrek sei tiro entzun zituen erizaintza klase batean, eta ondoren norbait "arma bat dauka" oihukatzen. Une horretan, ikasle guztiak ebakuatzea agindu zuen.
Unibertsitateak teologia, musika, erizaintza eta asiar medikuntza ikasketak eskaintzen ditu, eta bertan inguru horretako korear-estatubatuar kristau gehienek ikasten dute.