Romneyk Santorumen hazkundea geldiarazi du

Mitt Romney Massachusettseko gobernadore ohiak garaipen garrantzitsuak lortu ditu gaur Michiganen eta Arizonan, Alderdi Errepublikanoaren Etxe Zurirako hautagaia izateko barne hauteskundeen baitan. Ondorioz, hautagaitza indartu egin du hurrengo asteko 'superasteartea'ri begira.

Arizonan aise irabaztea ia segurutzat zuen, eta hala gertatu da, baina Michiganen berdinketa teknikoa zegoen Romneyren eta Rick Santorum lehiakide nagusiaren artean, inkesten arabera.

Michiganen, Romneyk ezinbestekoa izan behar zuen garaipena errepublikanoen hautagai bihurtzeko: aita gobernadorea izan zen estatu horretan, eta Romney bera han jaio eta hazi da. Beraz, galtzea kolpe handia izango zen.

Azkenean, irabazi egin du, baina alde txikiaz. Botoen % 97 zenbatuta, % 41 lortu ditu, eta Santorumek % 38.

Romney Alderdi Errepublikanoaren buruen faborito da, baina boto-emaileen artean ez du zirrara handirik piztu. Santorum, aldiz, sektore kontserbadoreenaren hautagaia da.

'Superasteartea'

Romneyk gaur lortutako garaipena garrantzitsua izan da, baina borroka inportanteena hurrengo astekoa izan liteke, orduan, martxoaren 6an, 'superasteartea' izango baitute.

Egun horretan, 10 estatutan egingo dituzte barne hauteskundeak, eta orotara 437 ordezkari banatuko dira (1.144 behar dira Alderdi Errepublikanoaren hautagaia bihurtzeko).

Inkesten arabera, badirudi estatuak hautagaien artean banatuko direla. Adibidez, Romney Virginian da faborito, Santorum Tennesseen, Oklahoman eta Ohion, eta Newt Gingrich Georgian. Azken estatu hori, gainera, ordezkari gehien banatuko dituena izango da (76).

Michiganeko ordezkariak nola banatuko diren jakiteko faltan, Romneyk 156 ordezkari lortu ditu dagoeneko, Santorumek 37, Gingrichek 38 eta Ron Paulek 27.