Aberats eta txiroen arteko tartea azken 30 urteetako handiena da

Txiroen eta aberatsen arteko ezberdintasun-tartea azken 30 urteetako handiena bilakatu da Ekonomia-Lankidetza eta Garapenerako Erakundea osatzen duten herrialdeetan. Datu hauek ELGEk egindako txosten batean ageri dira, eta bertan Espainia erakunde honen batez bestekoa baino zerbait gorago dagoela aipatzen da.

Txosten horretan azaltzen denez, ELGEko % 10eko aberatsenen diru sarrerak % 10eko txiroenen diru sarrerak baino 9 aldiz handiagoak dira. Espainiaren kasuan, berriz, batez bestekoa gainditu eta 11 alditan kokatzen da aldea.

Espainian, ELGEko herrialde gehienetan gertatu ez bezala, ezberdintasun hori jaitsiz joan da 80ko hamarkadatik aurrera. Nahiz eta nazioarteko erakunde horretako partaide diren herrialdeek azken 25 urteetan alde hori areagotu, Espainiak diferentzia hori mantentzen jakin du. Dena dela, azken bi urtetan atzeraldia egon dela onartu dute.

Brasilek du ezberdintasun handiena

Orokorrean, ELGEko txostenak gehien daukatenen eta gutxien daukatenen arteko tartea handitu dela jakinarazi du. Tarte hau instituzioetatik kanpo aritzen diren ekonomietan handiagoa bilakatzen ari da. Brasilen kasuan, txiro baten diru sarrera aberats batena baino 50 aldiz txikiagoa da.

Gainera, tradizionalki berdintasunezko gizartetzat hartu diren Alemania, Danimarka eta Suedian ere ezberdintasuna handitu dela ohartarazi dute, 1980an aberats eta txiroenen arteko diferentzia 5/1 bazen, gaur egun 6/1era igo baita.

Italia, Japonia, Hego Korea edota Erresuma Batuan diferentzia 1/10ekoa da, eta Israel, Turkia edo AEBetan 1/14koa. Kontran, Txile eta Mexiko dira ELGEko ratiorik handienetarikoa dutenak, herrialde horietan aldea 1/25koa baita.