Mundua -
Gerra Libian
Gadafi 'Libian ezkutatuta' eta 'osasuntsu' dago
Haren bozeramaileak ohartarazi du matxinoek ezin izango dutela topatu. Bestalde, hainbat militar gadafizalek Nigerrera ihes egin dute, 200-250 ibilgailuko konboi batean.
Erredakzioa
Muamar Gadafi Libiako diktadorea "osasuntsu dago", "Libian ezkutatuta", Musa Ibrahim haren bozeramaileak adierazi duenez. A IRai Siriako telebista-katean telefonoz egindako adierazpenetan, Ibrahimek ohartarazi du matxinoek ezin izango dutela topatu Gadafi.
"Libian dago, leku atzemaezin batean. Umore onez eta osasuntsu dago", gaineratu du matxinoak Tripolin sartu arte Erregimenaren eleduna izandakoak.
Bere esanetan, Gadafiren seme gerrazaleena, Saif el Islam, ere Libian dago, "baina leku batetik bestera mugitzen" ari da.
Matxinoek hainbatetan esan dute jakin badakitela non dagoen Gadafi, eta hura atzematea denbora kontua baino ez dela.
Gadafizaleen ihesa
Bestalde, 200-250 ibilgailuk ihes egin dute Nigerrera, herrialde horretako Armadak babestuta, Nigerreko eta Frantziako Armaden iturriek jakinarazi dutenez.
Antza denez, ibilgailu horietan Gadafiren aldeko militarrak joan dira, eta Gadafik eta Saif al Islamek konboi horretan joateko asmoa zuten.
