Herria 'traidoreengatik askatzeko' eskatu die Gadafik libiarrei

Muamar Gadafi agintari libiarra borrokarako prest egoteko eskatu die Libiako herritarrei zuzeneko hitzaldi batean, "Libia OTAN eta traidoreetatik askatzeko".

"Borrokarako prest egon zaitezte, gure herri garbia eta ona askatzeko prest egon zaitezte. Bataila-eremuan martirien odola izango da zuen energien iturria. Aurrera jarraitu, hartu zuen armak eta borrokara joan", esan du koronelak.

Horrez gain, Gadafik orain dela sei hilabete hasitako gatazkaren bukaera iragarri du. Gadafik egiten duen lehenengo mintzaldia da erreboltariek uda hasieran Tripoliren inguruan erasoaldirik handiena hasi zutenetik. Asken asteetan matxinatuek aurrerapauso garrantzitsuak eman dituzte, nahiz eta erregimenak informazio horiek ezeztatu.