Mundua -
Gerra Sirian
Siriaren aurkako erasoa Konstituzioaren araberakoa dela esan du Trumpek
Macronen esanetan, larunbateko bonbardaketa ez da Al-Asaden gobernuaren aurkako gerra deklarazioa izan, baizik eta nazioarteko zuzenbidaren eta NBEren ebazpenen defentsa.
agentziak
Donald Trumpp AEBko presidenteak Kongresuaren aurrean ziurtatu duenez, Konstituzioaren arabera jokatu zuen aurreko larunbatean, Erresuma Batua eta Frantziarekin batera, Siriaren aurkako erasoa agintzean, apirilaren 7an Ghoutan erregistratu zuten eraso kimikoari erantzunda.
"Ahalmen konstituzionalen arabera jokatu nuen, herrialdeak kanpo politikan dituen interesak defendatzeko, eskualdean egonkortasuna mantentzeko, eta segurtasun nazionala bermatzeko", ziurtatu du, Etxe Zuriak zabaldutako ohar baten arabera.
Era berean, agindua "edonolako arma kimikoak erabili eta zabaltzea saihestu, eta eskualdean egoera ez okertzeko" eman zuela baieztatu du.
"Estatu Batuek interesak defendatzeko beharrezko dituen neurri osagarriak abiaraziko ditu", dio Etxe Zuriak oharrean.
Agintariak txosten bat igorri du Kongresura "bi ganberak erabat informatuta egon daitezen", eta kongresistek emandako babesa eskertu du.
Oldarraldiari dagokionez, "indar estatubatuarrek, britainiarrekin eta frantziarrekin batera, suntsipen handiko armekin lotuta dauden zenbait instalazioaren aurkako erasoa egin zuten", azaldu du enpresaburu newyorktarrak.
"Operazioaren helburuak zientzia ikerketarako zentro bat, arma kimikoen biltegi bat eta bunker bat ziren. Gobernu siriarrak etengabe arma kimikoak erabiltzen dituelako, tartean apirilaren 7an Duman egindako eraso ikaragarria, eskatu nuen eraso egitea", Trumpen esanetan.
Macron: 'Ez da gerra deklarazioa'
Emmanuel Macron Frantziako presidentearen arabera, larunbatean egindako erasoa ez da Batxar al-Asaden Gobernuaren aurka egindako gerra deklarazioa, baizik eta nazioarteko zuzenbidearen eta NBEren ebazpenen defentsa.
Oldarraldiaren helburua " esparru aldeaniztunean modu zilegian esku hartzea" izan zen, ez Siriari gerra-deklarazioa egitea, esan du Macronek BFMTV telebista katean egin dioten elkarrizketa batean.
"Arrakasta izan genuen esparru militarrean: jaurtitako misil guztiek xedea jo zuten, Gobernu siriarraren arma kimikoak suntsituak izan dira eta ez da alboko biktimarik izan".
