Segurtasun-indarrek oposiziogileen protestak desegin dituzte Caracasen

Venezuelako Guardia Nazionalak gas negar-eragileekin sakabanatu ditu Caracaseko hainbat lekutan bildu diren oposiziogileen kontzentraziotako batzuk. Herriaren Defentsoriara bidean zihoazen, hiriaren erdigunean.

Oposizioko hainbat parlamentariok bideoak argitaratu dituzte, egoeraren berri emateko, Twitter sare sozialean, eta segurtasun-indarren aldetik jasandako “errepresioa” salatu dute, bereziki El Paraison (hiriburuaren mendebaldean) eta Santa Monican (hego-mendebaldean).

“Guardia Zibilak eraso egin digu, beste behin, gas negar-eragileak jaurti dizkigute gorputzera, eragin diezaguketen kaltean pentsatu gabe”, adierazi du Jose Manuel Olivares Primero Justicia alderdiko diputatuak. Halaber, “ondo-ondotik bonba bat jaurti” diotela azaldu du, El Paraison.

Bestalde, Gaby Arellano eta Juan Miguel Matheus diputatu oposiziogileek ere Santa Monican kontzentrazioak desegiteko gas negar-eragileak erabili dituztela esan dute.

“Kontzentratzen ari gara, eta ahalko lukeen modurik koldarrenean, Nicolas Madurok Guardia Zibila bidali du, gas negar-eragileekin erreprimitzera, hemen egoteagatik soilik”, adierazi du Matheusek.

Pertsona bat atxilotu dute, protesta batean emakume bat hiltzea leporatuta

Bestalde, gizonezko bat atxilotu dute, emakume bat hiltzea leporatuta, Tachirako (Venezuela mendebaldean) estatuan izandako protestetan.

Nestor Reverol Venezuelako Barne ministroak Vente Venezuela oposizioko alderdiko militante bati leporatu dio heriotza. Maria Corina Machado da alderdi horretako burua.

Ikerketen arabera, bi pisuko eraikin batetik jaurti ziren emakumea hil zuten tiroak, Reverolek azaldu duenez.

Susmagarriari hogei bat tiro jaurtitzea leporatu diote, baita “nahita antolatutako” krimena egitea ere. Ministroak azaldu duenez, 27 zorro jaso zituen gertaeren lekuan eta arma ezkutatzen saiatu zen, beste pertsona bati emanda.