Mundua -
Gerra Sirian
Ebakuazioarekin jarraitzeko autobusak Alepora iritsi dira
Aitzitik, Fua eta Kefraya ebakuatu behar zituzten autobusetako sei erre egin dituzte.
Agentziak | Erredakzioa
SANA albiste-agentzia estatalak igande honetan zabaldu duenez, erreboltariak, zibilak eta zaurituak ebakuatzen jarraitzeko autobusak Alepo ekialdera iritsi dira. Ebakuatzeko lan horien barruan Fua eta Kefraya herrien ebakuazioa ere aurreikusten da.
Elizabeth Hoff Osasunaren Mundu Erakundeko ordezkariak azaldu duenez, 13:00etan (Euskadiko ordua) ekin behar zieten ebakuatze-lanei.
Al Ijbariya kateak jakinarazi duenaren arabera, adostasuna dago Gobernuaren eta erreboltarien artean Alepo ekialdetik pertsonak ebakuatzeko Fua eta Kefraya herrietatik beste horrenbeste ebakuatzearen truke. Hain zuzen ere, 1.200 pertsona Alepotik eta antzeko kopurua bi herri horietatik.
Behin Fua eta Kefrayako ebakuatuak Gobernuaren menpe dauden gune seguruetara iritsita, Alepoko borrokalariek eta haien senideak ateratzeko baimena izango dute, Fua eta Kefrayatik talde gehiago atera daitezen truke.
Alabaina, Fua eta Kefraya ebakuatu behar zituzten autobusetako sei erre egin dituztela jakinarazi du Giza Eskubideen Behatoki Siriarrak. Itxuraz, guztira sei erre dituzte, eta beste bostek bere helmugara heltzea lortu dute.
