Brasilek azken agurra eman die hegazkin istripuko biktimei

Milaka pertsonek txalo egiten agurtu dituzte Brasilgo Chapecoense zelaian Kolonbian astelehenean hil ziren hegazkin istripuko biktimak.

Jarraitzaileek hainbat orduz itxaron dute euripean Arena Condako biktimei omenaldi jendetsua egiteko. 50 hilkutxa jarri dituzte, 19 jokalarirenak eta klubeko zuzendaritzako eta talde teknikoko hainbat kiderenak.

Loreak, pankartak, Brasilgo banderak, Chapecoensekoak eta baita Kolonbiakoak ere, izan dira zelaian.

“Zorionean eta nahigabean, nire urakana zu izango zara beti garaile”, irakur zitekeen zelaiko pankarta batean. “Eskerrik asko Kolonbiari”, hitzak ere irakur zitezkeen, Kolonbiako afizioak biktimei egindako agurra dela eta.

Michel Temer Brasilgo presidentea, Gianni Infantino Futboleko Nazioarteko Federazioko presidentea, Luis Figo futbol jokalari ohia, Carles Puyol eta Lucas Silva joan dira zeremoniara, besteak beste.

Istripua astelehen gauean izan zen, Medellin inguruan, eta 71 pertsona hil ziren, abioian zihoazen 77 lagunetatik. Gehienak klubeko partaideak ziren, baita Kolonbiako Atletico Nazionalaren eta Chapecoenseren arteko partidaren berri ematera zihoazen kazetariak ere.