Mundua -
Gerra Sirian
Zazpi eguneko su-etena, Sirian
Su-etena atzo 19:00etan sartu zen indarrean, alde guztiek beteko duten zalantzarekin.
AGENTZIAK | ERREDAKZIOA
Siriako Armadaren Komandantzia Gorenak zazpi egunerako su-etena iragarri zuen atzo, astelehena, Ameriketako Estatu Batuek eta Errusiak lortutako akordioari segida emanez.
Su-etena 19:00etan sartu zen indarrean, eta irailaren 18an, 23:59an, amaituko da.
Alabaina, Siriako Armadak zehaztu du talde armaturen batek su-etena errespetatzen ez badu indarrez erantzuteko aukera aztertuko duela.
Bestalde, Siriako Koalizio Nazionalak (oposizioaren aliantza nagusia) eta Siriako Armada Libreak jakinarazi dute su-etenaren aurrean “erantzun positiboa” emango dutela.
Su-etena indarrean sartu baino ordu batzuk lehenago, erasoak izan ziren Siriako hainbat tokitan.
Rami Abderrahman Siriako Giza Eskubideen Behatokiko zuzendariak esan du alde guztiak su-etena errespetatzen ari direla eta nolabaiteko lasaitasuna dagoela, oraingoz.
