Trumpen esanetan, Putin Obama baino 'agintari sendoagoa' izan da

Donald Trumpek, Ameriketako Estatu Batuetako (AEB) Presidente izateko hauteskundeetara begira Alderdi Errepublikanoaren hautagaiak, asteazken honetan egin dituen adierazpenetan baieztatu duenez, Vladimir Putin presidente errusiarra Barack Obama baino "askoz agintari sendoagoa izan da".

AEBko NBC telebista-kateak beteranoen gainean antolatutako foro batean parte hartu du Donald Trumpek, Hillary Clintonekin batera, eta foro horretan egin ditu aipatu adierazpenak. Horrez gain, Errusiako buruak "bere herrialdearen gainean erabateko kontrola" duela ere azpimarratu du.

Foroa proba gogorra izan da bi hautagaientzat:Trumpi Putini buruz esandakoen gainean galdetu diote, baita kanpo-politika arloan dituen proiektuei buruz ere; Clinton, bestalde, defentsiban egon da, Estatu idazkaria zen garaian bere posta elektroniko pribatua erabiltzeagatik.

Hautagai biek 30 minutu izan dituzte (lehendabizi Clintonek eta ondoren Trumpek) batak besteari ez erasotzeko aginduarekin, nahiz eta erabat bete ez duten.

Clintoni bere posta elektronikoa erabiltzeari buruz egin dizkioten galderak bereiziki gogorrak izan dira; izan ere, informazio sentikorra kudeatzeko ardura izandako batek baieztatu duenez, bera espetxean sartu izango zuketen hautagai demokratak egindakoa egin izanez gero.

Aitzitik, Estatu-idazkari ohiak bere jarduera defendatu du berriro, eta bere posta elektroniko pribatuaren (eta ez ziurraren) bidez bidali zituen dokumentuak ez zeudela isilpekotzat sailkatuta nabarmendu du.

Trumpi zuzendutako galderek, bestalde, honako hauek izan dituzte hizpide: Estatu Islamikoa talde jihadistaren aurkako estrategia, Putinekin duen harremana eta BEZaren gaineko proiektua. Gai horiei emandako erantzunek xehetasun gutxi izan dituzte, eta zeharka aritu da bere mintzaldian.

Eztabaida egin den egun berean jakin denez, berriro murriztu da Clintonek Tumpekiko duen abantaila, azaroaren 8an egingo diren presidentetzarako hauteskundeei begira.