Italiako Gobernuak larrialdi egoera ezarri eta laguntzak onartu ditu

Gobernu italiarrak larrialdi egoera ezarri du gaur, osteguna, herrialdearen erdigunea astindu zuen lurrikararen ondoriei aurre egiteko eta 50 milioi euroko diru-laguntzak onartu ditu, Matteo Renzi lehen ministroak iragarri duenez.

Gobernuburuak prentsaurrekoa eman du Ministroen Kontseilua egin eta gero eta, bertan, sismoaren eraginagatik "oso hunkituta" dagoela adierazi du.

Lurrikara asteazken goizaldean izan zen, 6 gradukoa Ritcher eskalan, eta erreskate taldeak bizirik jarraitzen duten pertsonen bila ari dira, baina gaur hilotzak bakarrik topatu dituzte.

"Berregituratzean pentsatu behar dugu, komunitate horretako emakume eta gizonenganako behar morala daukagu", esan du Renzik. Gainera, argi utzi nahi izan du "Gobernuaren eta herrialdearen lehentasuna" izango dela lurrikarak kolpatutako herriak normaltasunera itzularaztea.

Italian erlojuaren aurka ari dira lanean, bizirik dauden lagunak aurkitu eta erreskatatzeko. Ofizialki, 250 pertsona hil dira; tartean, Eusko Jaurlaritzak dituen datuen arabera, ez dago EAEko herritarrik. Kanpo-arazoetarako Espainiako Ministerioak, aldiz, baieztatu du Granadako emakume gazte bat hil dela; 27 urte zituen.

Hainbat erakundetako 5.400 lagun ari dira lanean, xede izanik hondakinak kentzea eta kaltetuei laguntza ematea. Italiako Babes Zibilak dituen datuek diote 1.000 polizia-agente dabiltzala, 1.060 suhiltzaile, 400 militar eta 3.000 bat boluntario, Gurutze Gorrikoak edo Baso Taldekoak, adibidez. Halaber, suhiltzaileek 30 txakur-unitate eraman dituzte, txintxorren azpian bizirik dauden lagunak topatzeko.

Babes Zibilak adierazi duenez, bilaketa-lanak kalte handienak izan dituzten herrietan ez dira eten gauean: "Lagun gehiago topatzea ezinezkoa dela pentsatzen dugunean utziko diogu bilatzeari, ez lehenago", esan dute. Arquata del Tronto, eta Pescara del Tronton (Ascoli probintzian), eta Amatricen eta Accumolin (Rieti probintzian).

Bertan dauden taldeen lana da, halaber, kaltetuei laguntzea; hori dela eta, 4.000 laguni ostatu emateko moduko kanpalekuak prestatu dituzte, Accumoli, Amatrice, Montegallo eta Arquatan, bai eta Umbria eskualdeko beste bost udalerritan ere; Umbrian ez da biktimarik izan, baina bai kalte materialak, eta, hala, etxean lo egiteko beldur direnek aukera izango dute gaua leku seguruan pasatzeko.

Erreplikak etengabean

Eraikin gehiago erori dira gaur, osteguna, Amatricen, 4,3 graduko lurrikara berri batek eskualdea astindu eta gero. Sismo berria 14:36ean izan da,  Geofisika eta Bolkanologia Institutu Italiarrak (IGNV) zehaztu duenez, eta Amatriceren parkearen ondoan zegoen eraikin bat goitik behera bota du, hain zuzen, boluntarioentzako behin behineko ostatua dagoen lekuan.

Hala, sismoak beldurrak airean eduki ditu Amatriceko bizilagunak eta jendearen urduritasuna nabaria zen kalean, horietako askok alde egin behar izan dute etxetik asteazkeneko lurrikaragatik.

IGNVren arabera, 470 erreplika baino gehiago izan dira atzo goizaldeko lurrikara izan zenetik.

Zehatz-mehatz, erreplika gehienak 3-4 gradukoak izan dira, baina Norcia inguruan 5,4koa jaso dute 04:33ean.

5:17ean, epizentroa Accumolin izan duen 4,5koa erregistratu dute, alegia, Italiako erdigunea txikitu duen lurrikara izan zen zonalde berean.

EAEko herritarrik ez, hildakoen artean; Granadako emakume gazte bat zendu da

Eusko Jaurlaritzak dioenez, esku artean dituen datuen arabera, ez da EAEko herritarrik hildakoen artean. Hala esan diote Jaurlaritzaren iturriek Europa Pressi.

Iñigo Urkullu lehendakariak telegrama bat bidali dio Italiak Bilbon duen kontsulari, lurrikararen ondorioen aurrean doluminak adierazteko: "Oso hunkituta gaude biktimen balantzea ikustean, bai eta kalte material handien berri izatean", zioen telegramak.

Kanpo-arazoetarako Espainiako Ministerioak, aldiz, berretsi dio Eferi emakume espainiar gazte bat hil dela.