Mundua -
Europar Batasuna
Erresuma Batuak uko egin dio 2017an EBren presidentetza hartzeari
2017an Europako Kontseiluko presidentetza egokitzen zitzaion, eta uko egin dio, 'brexit'aren erdian delako, Theresa May lehen ministro britainiarraren hitzetan.
agentziak | erredakzioa
Erresuma Batuak uko egin dio hurrengo urtean Europako Kontseiluko txandakako presidentetza hartzeari, ekaineko erreferendumean Europar Batasunetik ateratzearen aldekoak gailendu ostean, Downing Streetek gaur jakitera eman duenez.
Theresa May lehen ministro britainiarrak telefonoz deitu zion atzo Donald Tusk kontseiluko presidenteari erabakiaren berri emateko.
Buruzagi kontserbadoreak duela astebete hartu zuen David Cameronen kargua, horrek 'brexit'aren garaipenarengatik dimisioa eman ostean.
Erresuma Batuak 2017ko bigarren seihilekoan hartu behar zuen kontseiluaren txandakako presidentetza, urte amaiera arte, baina Mayk nahiago izan du kargu hori ez hartu, britainiarrek Europar Batasuna uztea erabaki dutelako.
Mayren bira
Lehen ministroa Angela Merkel Alemaniako kantzilerrarekin bilduko da gaur, Elisabet II.a erreginak gobernua osatzea agindu zionetik atzerrira egin duen lehenengo bidaia ofizialean.
Bihar, berriz, Parisera joango da May, François Hollande Frantziako presidentearekin elkartzeko.
