Europarekin harremanak mantentzearen alde egin du Boris Johnsonek

Boris Johnson Erresuma Batuko Atzerri ministroak ohartarazi du Europar Batasunetik ateratzeak ez duela esan nahi "harremanak haustea".

Theresa May lehen ministroak atzo izendatu zuen Atzerri ministro Londresko alkate ohi polemikoa, eta izendapenak hautsak harrotu ditu nazioartean. Adibidez, Jean-Marc Ayrault Frantziako Atzerri ministroak esan du Johnson ez dela egokia kargurako, brexitaren kanpainan "gezur asko" esan zituelakoan.

Johnsonek, baina, ez die erantzun bere aurka egin dutenei, eta Erresuma Batuaren "nortasuna" berriz diseinatzeko unea dela adierazi du. Gainera, herrialdeak nazioartean "aktore garrantzitsua" izaten jarraituko duela aurreratu du.

Horren ildotik, nabarmendu du ez direla gauza bera "Europar Batasunetik ateratzea” eta “Europarekin harremanak haustea".