Mundua -
Eskoziako erreferenduma
Londresek autonomia gehiago agindu dio Eskoziari, ezezkoa irteten bada
Gobernu britainiarrak Eskoziako politikariak autonomia akordioa aztertzera gonbidatuko ditu, referendumeko emaitza ezezkoa bada.
Erredakzioa
Erresuma Batuko gobernuak Eskoziaren autonomia handitzeko bilera batera deituko ditu politikari eskoziarrak, irailaren 18an egingo duten referendumean ezezkoa irteten bada, Allstair Carmichael Eskoziarako ministroak jakinarazi duenez.
Eskoziarako ordezkari britainiarrak etorkizunerako dituen asmoak aurkeztuko ditu bihar Glasgowen. Gaur, aurrerapen bat egin du.
Gobernu zentralaren asmoa urrian bilera bat antolatzea da, beti ere referendumean ezezkoa irteten bada.
‘Ezezkoa irtenez gero, aldaketa bat egongo da. Eskoziak eskumen gehiago izango ditu’, esan du Carmichaelek.
‘Emaitza ezezkoa bada, Eskoziako alderdi nagusietako ordezkariak gonbidatuko ditut prozesuari hasiera emateko. Eskozia berriari buruzko biltzar bat egongo da herri honen interesen alde lan egiteko’, gaineratu du.
David Cameron lehen ministroak, bestalde, referendumaren emaitzak ‘atzerakorik ez duela’ adierazi zuen atzo. Eta eskoziarrek ez dutela bozkatzeko beste aukerarik izango jakinarazi zuen.
BBC kateari egindako adierazpenetan, kontsulta ‘erabakigarria, legala, justua, itzulezina eta bete beharrekoa’ izango dela esan zuen.
Joan den asteburuan egindako inkestan, eskoziarren % 48k independentziaren kontra bozkatuko dutela esan zuten; % 36k, aldeko botoa emango dutela, eta % 15ek ez dakite zer bozkatu oraindik.
