Mandela larri dago, baina egonkor, biriketako infekzioak jota

Hego Afrikako Gobernuak jakinarazi duenez, Nelson Mandela bere kabuz ari da arnasa hartzen, eta hori "seinale ona da", oraindik ere ospitalean jarraitzen badu ere.

"Madiba borrokalaria da, eta borrokan jarraitzen duen bitartean ongi egongo da. Bere kabuz arnasa hartzeko gai dela esan didatea medikuek, eta hori seinale ona dela uste dut nik", adierazi du Hego Afrikako Gobernuko bozeramaileak.

Nelson Mandela Hego Afrikako presidente ohia ospitaleratu egin dute larunbat honetan, berriz ere, biriketako infekzioak jota. Hego Afrikako Gobernuak jakinarazi duenez, larritasunaren barruan egonkor dago.

Mandela hainbat alditan egon da azken urteetan ospitaleratuta, eta oraingoan, lehen aldiz, Mandelaren "egoera larria" aitortu du Hegoafrikako Gobernuak.

"Gaur goizaldean 01:30ak aldera (23:30 GMT) haren osasun egoerak okerrera egin du, eta Pretoriako ospitale batera eraman dute", azaldu du Gobernuak ohar bidez.

Mandelak 94 urte ditu, eta martxoan ere ospitalean egon zen arazo bera tarteko. Hamar egun egin zituen ospitalean, eta apirilaren 6an eman zioten senda-agiria.

67 urte eman zituen "Apartheid"aren aurka borrokan, eta horren ondorioz, 27 urte eman zituen espetxean.

1993an Bakearen Nobel saria eman zioten Apartheid-aren aurka egindako lanagatik eta urtebete geroago, Hegoafrikako presidente izendatu zuten; bertako historiako lehen presidente beltza.

Johannesburg eta Qunu (haurtzaroa pasatu zuen herria) artean bizi da egun, medikuen zaintzapean.

Azkenekoz Hegoafrikan egin zen Munduko Futbol Txapelketan agertu zen jendaurrean, 2010. urtean.