Alderdi tradizionalek hauteskundeak irabazi dituzte Islandian

Alderdi Independenteak (eskuindarra eta euroeszeptikoa) eta Alderdi Progresistak (zentro-ezkertiarra) bakoitzak 19 jesarleku lortu dituzte Islandian izandako hauteskundeetan. Horrela, bi alderdi horiek egun Gobernuan dagoen koalizioa boteretik botatzea lortu dute.

'Morgunbladid' kazetak jakitera eman duenez, Alderdi Independenteak botoen % 26,7 lortu du (aurreko hauteskundeekin alderatuta, hiru puntu gehiago). Alderdi Progresistak, berriz, bozen % 24,4 eskuratu du (9,6 puntu gehiago), botoen % 100 zenbatu ostean, datu ofizialen arabera.

Aliantza Sozial Demokrata alderdiak jaso du porrot handiena, botoen % 12,9 baino ez lortu ostean (9 jesarleku). 2009ko hauteskundeekin alderatuta, alderdi horrek 16,9 puntu galdu ditu. Mugimendu Ezkertiar-Berdeak bozen % 10,9 lortu du (7 jesarleku), duela lau urte baino 10,8 puntu gutxiago.

Gainerako diputatuak bi alderdik eskuratu dituzte: Sekulako Etorkizuna (% 8,2, 6 jesarleku) eta Alderdi Pirata (% 5,1, 3 jesarleku).

Larunbat honetan izandako hauteskundeen ostean, alderdi tradizionalak boterera itzuli dira, azken urteetako finantza-krisiaren erantzuletzat jo badituzte ere. Hala ere, 1987tik lau alderdi nagusik lortutako emaitzarik txarrenak dira, klase politikoarengana herritarrek duten mesfidantzaren isla dena.