Konklabea aurreratzeko baimena eman die Benedikto XVI.ak kardinalei

Aita santu berria aukeratzeko konklabea "aurreratzeko" askatasuna eman dio Benedikto XVI.ak Kardinalen Elkargoari, gaur idatzitako dokumentuan, Vatikanoak jakinarazi duenez.

Dokumentu horretan, konklabearen inguruko "aldaketa batzuk" sartu ditu aita santuak. Aldaketa horiek gabe, konklabea martxoaren 15etik 20ra ospatu beharko litzateke.

Aita santua hiltzen denetik edo kargua uzten duenetik berria aukeratzen den egunera arte, "hamabost egun" igaro beharko dira "konklabea hasteko", Benedikto XVI.ak gogoratu duenez.

"Hala ere, Kardinalen Elkargoari konklabea aurreratzeko askatasuna eman nahi diot, parte hartu behar duten kardinal guztiak bertan baldin badira. Arrazoi larriak egongo balira konklabea atzeratzeko ahalmena ere eman nahi diot", zehaztu du.