Gizartea -
Zentral nuklearra
Garoñaren itxierak ez du atzera bueltarik, Soriaren arabera
Industria ministroak azaldu duenez, "ez zuten jarraitzea eskatu, eta erabaki hori ezin da zuzendu".
Erredakzioa
Jose Manuel Soria Industria, Energia eta Turismo ministroak aitortu du ezustean harrapatu zuela Garoñako zentralak jarduera ez luzatzeko hartutako erabakiak, eta erabaki horrek ez duela atzera bueltarik azpimarratu du.
"Ez dugu azalpenik aurkitu luzapena ez eskatzeko, baina haien eskubidea da eta zilegitasun osoa dute, guk ez dugu inor behartuko luzapena eskatzera", adierazi du Soriak.
Gaineratu duenez, ministroak berak eta Ministerioko kideek jardueraren luzapena eskatzea proposatu zioten Nuclenorri (Endesarena eta Iberdrolarena % 50ean), energia sektorearen erreformaren edukia kontuan izan gabe, izan ere, horixe jartzen zuen enpresak luzapena ez eskatzeko arrazoi gisa.
Hori horrela, Nuclenorrek, erreformaren berri izan ostean, luzapenari uko egiteko aukera izango lukeela azpimarratu du Soriak.
"Hori bai, ez zuten jarraitzea eskatu, eta erabaki hori ezin da zuzendu", berretsi du ministroak.
