Entzierro azkarra eta garbia, korrikaldi politekin

2012ko sanfermin entzierro azkarrena

Dirudienez, ez da korrikalaririk zauritu adarkadaz, baina eroriko eta estropezu asko izan da. Ondorioz, lau pertsona ospitalera eraman behar izan dituzte, baina ez dute zauri larririk.

Ohikoa den legez, zortzietan suziria jaurti eta berehala, ukuiluko ateak ireki dituzte eta ziztu bizian atera dira El Pilarren zezenak Santo Domingoko aldapan gora.

Santo Domingon ez da aparteko gertakaririk izan, labainkadak eta erorketa batzuk besterik ez. Udaletxe parera ailegatzerako zezen taldea bakanduta zegoen.

Horrela egin dute ibilbide osoa, taldetan banatuta. Horri esker, korrikalariek adarretara gerturatu eta zezenaren aldamenean korrikaldi politak egiteko aukera izan dute. Gainera, animaliek zintzotasun handia erakutsi dute, korrikalariei jaramonik egin gabe egin baitute aurrera.

Zezen plazan ere ez dute denborarik galdu eta zuzenean sartu dira ukuilura, bi minutu eta 22 segundotan.