Gizartea -
Sanferminak Iruñean
Sanferminak 'antolaketa eredu' izan daitezen nahi du Poliziak
Enfasi berezia jarriko dute “Riau Riau” ekitaldian, aurten berriro ere ospatuko dute hori, istiluak zirela eta, 1997an egitarau ofizialetik kendu baitzuten.
Erredakzioa
Nafarroan lan egiten duten hainbat Polizia arduradunek segurtasun dispositiboa prestatu dute San Fermin jaietarako; koordinaturik egingo dute lan, Iruñea “antolaketa eredu” izan dadin.
Enrique Maya Iruñeko alkateak Segurtasun Batzordean onartutako dispositibo horren berri eman du prentsaurreko batean ostiral honetan, Carmen Albarekin, Nafarroako Gobernuko ordezkariarekin eta Javier Morrasekin, Presidentetza, Justizia eta Barne kontseilariarekin batera.
Dispositiboa 110 eta 140 polizia foralek, 450 udaltzainek eta 108 babes zibileko laguntzailek osatuko dute, Polizia Nazionaleko eta Guardia Zibileko agenteekin batera.
Carmen Alba ordezkariak esan duenez, alkoholemia eta droga kontrol “zehatzak” egongo dira hiriko sarrera eta irteeretan, eta 016 telefonoa dagoela gogorarazi du, edozein motatako delituak salatu nahi izanez gero, delitu sexistak barne.
Poliziaren koordinazioak enfasi berezia jarriko du txupinazoan, prozesioan eta “bezperako martxan”, Riau Riau bezala ere ezagutzen denean. 1997an egitarau ofizialetik kendu zuten, bertan sortzen ziren istiluak zirela eta, eta aurten berriro ere ospatuko da.
Lapurretak eta kaleko legez kanpoko saltokiak (batez ere, janaria saltzen dutenak) murrizten saiatuko direla ere adierazi du Mayak.