Alde Zaharreko eraikin bat hartu duten gazteak babestu ditu Bilduk

Bilduren udal gobernuak adierazi duenez, Alde Zaharrean, Urgull mendiaren inguruan, etxe pribatu bat okupatu duten gazteen "diagnostikoarekin" bat dator, "hirian espazio kultural autogestionatuak behar direlako".

Udal taldeak ohar batean azaldu duenez, "kulturaren eta aisiaren autogestioaren" alde egingo du, "gazteek eskatzen duten zerbait delako eta kultur programaziori begira emaitza onak dituelako".

Gainera, ekonomiaren aldetik, "baliabide publiko gutxi” behar duen zerbait dela nabarmendu du, "gazteek auzoarentzat edo hiriarentzat ekintzak egiteko leku bat izateaz gain".

Udaltzaingoak eta Josetxo Ibazeta Alkatetzako idazkariak jabetza pribatuko eraikina hartu duten Gazte Asanbladako gazteei informatzeko egin duten lana txalotu du Bilduren udal gobernuak, "bi aldeen arteko komunikazioa errazteagatik". ‘Uxotegi’ izena jarri diote eraikinari, Orixe ikastolatik gertu dagoen usategiari omenaldia eginez.

PSEk Bilduren Gobernuaren bitartekotza kritikatu du

Enrique Ramos PSEk Donostian duen zinegotziak "kezkagarritzat" jo du Donostiako Udalaren "bitartekaritza", "nahiz eta eraikina aspalditik hutsik egon".

Ramosen hitzetan, duela zenbait egun "gazte talde batek Gaztelubide kaleko eraikin bat okupatu du, Urgull mendira igotzeko aldapatik gertu". Azken urteetan hutsik egon dela ekarri du gogora, eta eraikinaren "segurtasuna" zalantzan jarri du.