Gizartea -
GERTAERA
Bost mendizale erreskatatu dituzte Aralarren
Puttarri tontorretik jaisten ari zirela galdu egin dira. Nekatuta baina onik erreskatatu dituzte.
AGENTZIA | ERREDAKZIOA
Guardia Zibilak Aralarren galdutako bost mendizale erreskatatu ditu asteburu honetan. Etxarri Aranatzen, Puttarri tontorretik jaisten ari zirela, noraezean geratu dira.
Larunbat arratsaldean abiatu zuten bilaketa Nafarroako larrialdi zerbitzuetako helikoptero batekin batera, Guardia Zibilak jakitera eman duenez.
Helikopteroak gune aldapatsu batean aurkitu zituen galdutako mendizaleak.
Bertan lur hartu ezin zuenez, helikopteroaren garabia erabili behar izan zuten mendizaleak banan-banan ateratzeko, eta NA-120 errepidera eraman zituzten; handik behera, ibilgailuz jaitsi zituzten.
Nekatuta baina onik zeuden guztiak.
Azkenean, euren ibilgailuetan egin zuten etxerako bidea.