Baliogabe utzi dute Bilboko kalamu elkarte bateko kideen aurkako zigorra

Auzitegi Konstituzionalak baliogabetu egin du Auzitegi Gorenak 2015ean Pannagh Bilboko kalamu elkarteko lau kideri ezarritako zigorra. Izan ere, Auzitegiaren arabera, akusatuen defentsarako eskubidea urratu zen eta ez zuten bermerik izan prozesu judizialean.

Konstituzionaleko Bigarren Aretoak azaldu du akusatuek Gorenean azalpenak emateko eskubidea zutela epaia eman aurretik. Izan ere, eurek ez zekiten euren jokabidea legez kanpokoa zela. Horregatik, epaia bertan behera utzi du, eta prozesu judiziala epaia argitaratu aurreko egoerara itzultzea agindu du.

Lau akusatuek azpimarratu dute uste zutela legearen arabera jarduten ari zirela, elkartea erroldatuta zegoelako eta erakundeekin harremanetan zegoelako.

Auzitegi Gorenaren zigorra

Elkarteko lau kideak bi aldiz ikertu dituzte, baina bi kasuak bertan behera utzi zituzten. Bat froga faltagatik artxibatu zuten, eta, beste auzian, kalamua itzuli egin zieten akusatuei, Ertzaintzak plantazioaren berri izanda ere horren aurka egin ez zuelako, Hector Brotons abokatuaren arabera.

Bigarren ikerketari dagokionez, droga-trafikoa egotzita epaitu zituzten Bizkaiko Lurralde Auzitegian, baina laurak absolbitu zituen. Bilboko Udaltzaingoak 80 kilo marihuana topatu zituen (elkarteko 320 kideentzat ari ziren hazten), baina bertan behera utzi zuten kasua, kontsumo propiorako zela eta sarri tratamenduetarako ere erabiltzen zela argudiatuta.

Auzitegi Gorenak, ostera, osasun publikoaren aurkako delitutzat jo zuen Pannagh elkarteko kideen jokabidea, Zigor Kodearen 368. artikulua aplikatuta. Argudio horrekin, Auzitegi Gorenaren Bigarren Aretoak sei hilabete eta urtebete eta zortzi hilabete arteko zigorrak eta 250.000 eurorainoko isunak ezarri zizkien auzipetuei.