Preserbatiboen inguruan 'pauso gehiago' eskatu dizkio Aidok Elizari

Aita Santuak preserbatiboaren erabilera zenbait kasutan justifikatuta dagoela adierazi eta biharamunean, Bibiana Aido Berdintasunaren Estatuko idazkariak hitz horiek "aurrepauso" bat direla baloratu du, baina horren ustez, "herritarrengana hurbiltzeko pauso askoz gehiago ematea beharrezkoa da".

Aidoren hitzetan, "preserbatiboaren erabilpenak Afrikan ihesa geldituko ez duela esateak arduragabekeria izugarria da".

Emakumeen Fundazioak eta Emakume Aurrerakoien Federazioak bat etorri dira Aidorekin, eta Benedikto XVI. adierazpenak "aurrerapauso txikia" dela esan dute. Halaber, gai honen inguruan "tinkotasun handiagoa" eskatu diote Elizari.

Ratzingerrek La luz del mundo. El Papa, la iglesia y las señales del tiempo. Una conversación con el Santo Padre Benedicto XVI liburuan preserbatiboaren inguruan esandakoei buruzko euren iritzia plazaratu dute Maria Soleto Emakumeen Fundazioko presidenteak zein Yolanda Besteiro Emakume Aurrerakoien Federaziokoak.

Nolanahi ere, "biziak salbatzeko edozein tresna ongi etorri da", esan du Soletok, eta Eliza gai horren inguruan "tinkotasun handiagoz hitz egin beharko luke".

Besteiroren esanetan, Aita Santuak preserbatiboaren erabilera zenbait kasutan onartu badu ere, oinarria "berdina izaten jarraitzen du", jarraian "ihesari aurre egiteko modua" ez dela gaineratu duelako.