Bi istripuk zirkulazioa oztopatu dute Ermuan, saihesbidearen lehen orduetan

Asteazken goizean Ermuan (Bizkaia) izandako bi istripuk zirkulazioa oztopatu dute bertan, goizeko lehen orduetan; hain zuzen ere, 06:00etan saihesbide berria ireki dute herrian, eta istripuak 07:30ean eta 07:40an izan dira. 07:30era arte, ibilgailuak normaltasunez ibili dira saihesbidetik, baina gero auto-ilarak sortu dira. 09:00ak jota zirenean, oraindik ere bazeuden pilaketak. Istripuak puntu berean gertatu dira, ordainleku zaharraren irteeran; bata Bilbora bidean izan da, eta bestea, aldiz, Eibarrera bidean. Hala eman diote jakitera eitb.eus-i Ermuko Udaltzaingoaren iturriek.

Aipatutako iturrien arabera, bi istripu horiek direla eta, oraindik ez dago jakiterik loturarik dagoen saihesbidearen irekieraren eta auto-ilaren artean; goizegi da hori aztertzeko. Radio Euskadik jakitera eman duenez, Bizkaiko Foru Aldundiak 74 milioi euro erabili ditu azpiegitura berri honetarako, eta, aurreikuspenen arabera, 9.000 ibilgailu aterako ditu Ermuko erdigunetik. Ermuko zirkulazioa nabarmen arinduko da, beraz, horri esker.

600 metroko tunela

Uretamendiko tunelak irekita, saihesbidearen lehen fasea amaitu da. Tunelek 600 bat metroko luzera dute, lanek urte eta erdi iraun dute, eta lanak hasieran iragarritakoa baino garestiagoak izan dira, aurreikuspenetan jasotakoa baino % 9 gehiago behar izan baitute horiek egiteko.

Asteazken honetan, ordainlekuetako kabina berriak ere zabaldu dituzte; AP-8 autobideko eta N-634 errepideko sarbide zuzen berritik iritsitako milaka gidariri emango diete zerbitzua. Igandera arte (urtarrilaren 14ra arte, alegia), ordainleku berria eta zaharra erabiltzeko aukera izango dute gidariek.

Hemendik aurrera, saihesbidearen hurrengo fasea abiatuko dute. Bilbotik iritsitako ibilgailuen kopurua arinduko dute bigarren fase horretan.