Adingabe batek pairatutako sexu-erasoa salatu du Sestaok

Sestaoko Udalaren hainbat ordezkari, Berdintasun udal Foroaren zenbait kide eta dozenaka herritar izan dira, astearte honetan, adingabe batek pairatutako sexu-erasoa salatzea xede izan duen elkarretaratzean. Aurreko ostiralean izan zen erasoa, Sestaon bertan.

Protesta Udalak berak zuen deitua, eta arratsaldeko zazpietan hasi da, Kasko plazan. Lemak honakoak izan dira: 'Indarkeria sexistari ez', eta 'Kaleak ere gureak dira. Erantzunik gabeko erasorik'.

300 bat lagun, Udalak esan duenez, izan dira mobilizazioan. Josu Bergara alkatea izan da bertan, bai eta Udalean ordezkatuta dauden talde politiko guztiak ere. Berdintasun udal Foroaren kideak ere egon dira, eta hainbat herritar.

Erasoa aurreko ostiral gauean izan zen; Ertzaintzari gazteak esan zionez, 'sexu-motako ukitzeak' jasan zituen.

Udalaren adierazpena

Udalean ordezkaritza duten talde politikoek astelehen honetan adostu zuten gaitzespen-elkarretaratzea deitzea, jazotakoa salatzeko adierazpen baten bidez. Agirian, nabarmentzen zuten sexu-erasoak direla 'emakumezko eta gizonezkoen artean bizi garen desberdintasun-egoeraren ondorio larriena'.

Adierazpenak berresten zuen, halaber, Udalak gaitzesten duela 'emakumeen bizitza eta duintasunaren aurka doan edozein ekintza edo jarrera diskriminatzailea'; halaber, aldarrikatzen zuen tinko jarraituko duela lanean, 'orain arte egin dugun bezala', indarkeria sexistaren aurka eta berdintasunaren alde.

Azkenik, herritarrei eskatzen zien 'indarkeriaren aurka egiteko, xede izanik, guztion artean, berdintasunezko Sestao bat egitea'.