Gizartea -
Emakumeen aurkako indarkeria
Bi neska adingabek sexu abusuak salatu dituzte Gasteizen
Hori dela eta, Ertzaintzak 22 eta 19 urteko bi gazte atxilotu ditu, eta epailearen esku geratu dira.
eitb.eus
Ertzaintzak 22 eta 19 urteko bi mutil atxilotu zituen aurreko larunbatean, abuztuak 26, bi neska adingaberi sexu abusuak egitea leporatuta.
Gertaera 22:00ak aldera jazo zen, larunbatean. Pertsona batek Ertzaintzaren telefonora deitu eta bi neska adingabe parke batean topatu zituela adierazi zuen. Pertsona horrek azaldu zuenez, neskek abusuak pairatu zituztela esan zioten.
Segurtasun Sailak ohar baten bidez zehaztu duenaren arabera, zenbait agente bertaratu ziren eta han topatu zituzten biktimak. Horiek gertatutakoa azaldu zuten; abusua Zaramaga auzoko etxebizitza batean gertatu zen. Bi gaztek gonbidatuta joan ziren etxebizitza horretara.
Geroago Ertzaintzaren aurrean aurkeztutako salaketan azaldu zutenez, behin etxebizitzan zeudela, bi gizonezkoek ukituak egiten hasi zitzaizkien, nahiz eta neskek kontrakoa esan zieten. Horren aurrean, neskak etxebizitzatik irten ziren, estu eta larri.
Biktimak ospitalera eraman zituzten ondoren, auzitegiko medikuak azterketa egin ziezaien. Horren ostean, Gasteizko Udaltzaingoak ustezko bi erasotzaileak aurkitu, identifikatu eta atxilotu zituen.
Atzo, igandean, atxilotuak epailearen esku utzi zituzten. Behin behinean, epaileak babes neurriak ezarri zituen: urruntze aginduak eta haiekin harremanetan jartzea, edozein modutan.
_________________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.
