Sei atxilotu Nafarroan azken egunotan, emakumeen aurkako delituak egotzita

Foruzaingoak indarkeria matxistarekin zerikusia duten sei atestatu egin ditu azken egunotan, Nafarroako zenbait herritan.

Antsoainen, udaltzainek 49 urteko gizon bat atxilotu zuten, indarkeria matxista delitua leporatuta. Foruzainen esku utzi zuten.

Ustezko erasotzaileak kalteak eragin zituen etxebizitza batean, Foruzainen esanetan, eta biktima beldurtuta zegoela azaldu dute, bikotekideak erakutsitako indarkeriagatik. Besoetan zituen hainbat ubeldura eta lesio erakutsi zizkien agenteei.

Horrez gain, antzeko kasu bat jazo zen Iruñean. Izan ere, 32 urteko iruñear bat salatu zuen haren bikotekide ohiak, "etengabe jazarri eta kontrolatzeagatik".

Tafallan, 21 urteko beste gazte bat atxilotu zuten. Antzeko delituengatik aurrekariak zituen, eta 18 urteko bikotekideak tratu txarrak salatu zituen. Ustezko erasotzailea epailearen esku utzi zuten.

Halaber, 34 urteko gizonezko bat atxilotu zuten Arbizun, senitarteko batengandik urruntzeko kautelazko neurria urratzeagatik.

Bestalde, 44 urteko bikotekideak jo egin ziola salatu zuen emakume batek Iruñean, eta atxilotu egin zuten. Emakumeak hainbat kolpe zituenez, ospitalera eraman zuten, zauriak artatu eta lesioen txostena egiteko.

Azkenik, Tafallan, gazte batek poliziari deitu zion, aisialdirako lokal batean bikotekide ohiarekin topo egin zuelako. Babesa jasotzeko agindua zuela adierazi zuen; hortaz, 21 urteko ustezko erasotzailea atxilotu zuten.

---

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.