Abisu horia haizeagatik, astelehenean

Eusko Jaurlaritzako Larrialdiei Aurre Egiteko eta Meteorologiako Zuzendaritzak abisu horia ezarri du astelehenean; izan ere, 80 km/h-ko haize-boladak espero dira EAEn mendialdean.

Haize ufada gogorrak izan dira goizaldean, eta 120 km/h-ko abiadura harrapatu dute mendialdeko zenbait tokitan, eta 80-100 km/h-koak, kostaldean.

Haizeguneak diren mendialdeko lekuetan abisuak indarrean jarraituko du astelehenean ere, 12:00ak arte. Goizean, hego-ekialdeko haize-ufadek 80 km/h-ko abiadura har dezakete haizeguneak ez diren Gipuzkoa barnealdeko tokietan, Bizkaiko barnealdean eta Araban. Kostaldean, ordea, hego-ekialdeko haizea 60-80 km/h-koa izan daiteke.

Nafarroan, Belaguako mendatea itxi behar izan dute, haizeteengatik

Nafarroan, Belaguako mendatea itxi dute, Pirinioetako hainbat gunetan izandako haizeteen ondorioz; eta, badaezpada, elur-pistak jendez hustu dituzte.

Nafarroako Gobernuaren arabera, Burgi-Izaba-Frantzia NA-137 errepidea itxi dute, 51. kilometrotik aurrera, Belaguako aterpetik gertu.

Bestalde, Nafarroako beste eremu batzuetan izandako haize-bolada gogorrek teilak eta beste hainbat objektu arriskutsu bota dituzte. Hori dela eta, suhiltzaileek esku hartu behar izan dute.