2017ko lehen ilargi eklipsea, goizaldean

2017ko lehen eklipsea ilargiaren ilunantza izango da, eta ostiraletik larunbatera doan goizaldean ikusiko dugu. Fenomeno astronomikoa jarraitzeko baldintzak oso onak badira ere, eklipse mota hau ez da oso deigarria, atzemateko zaila baita.

Espainiako Behatoki Astronomikoak emandako datuen arabera, ilargi eklipsea 23:34an abiatu eta 03:53an bukatuko da, goia 01:45ean harrapatuta.

Lurra Eguzkiaren eta Ilargiaren artean kokatzen denean gertatzen da ilargi eklipsea, eta ilbetean bakarrik gerta daiteke, garai horretan kokatzen baita Lurra Eguzkiaren eta Ilargiaren artean. Hori horrela, penunbrako eklipsea ez da ilargi eklipse osoa edo partziala bezain ikusgarria. Eklipse osoan ilargia erabat estali egiten da, eta partzialean, kolore gorrixka hartzen du.

Hala, ilargiaren iluntze txikia ikusiko dugu. Ilargia Leo eta Cancer konstelazioen artean egongo da, Regulo izarra distiratsuaren ekialdean.

2017ko hurrengo eklipsea abuztuaren 21ean izango da. Eguzki eklipse partziala izango da, baina kasu honetan ere, atzemateko zaila izango da, iluntzearekin bat egingo duelako, Euskal Herrian bederen. AEBn, berriz, ikusgarria izango da, eguzki eklipse osoa baitago iragarrita.