13.500 minbizi-kasu berri antzematen dituzte urtean Euskadin

13.500 minbizi-kasu berri inguru antzematen dira urtean Euskal Autonomia Erkidegoan, Eusko Jaurlaritzako Osasun Sailak bihar ospatuko den Minbiziaren aurkako Nazioarteko Egunaren harira gaur ezagutarazi dituen datuen arabera. 2009 eta 2013. urteen artean, 67.409 minbizi-kasu antzeman zituzten: 40.312 gizonetan eta 27.097 emakumetan.

Datuek agerian uzten dutenez, minbiziak eragin handiago du gizonezkoetan, eta adinarekin batera gora egiten du, gaixo gehienak 65 urtetik gorakoak baitira.

Ohikoenak diren minbiziei erreparatuta, kasuen erdiek lau minbizia motari dagokie: kolon eta ondestekoa (ohikoena gizon zein emakumetan), bularrekoa (emakumeen artean ohikoena), prostatakoa (gizonetan) eta biriketakoa.

Heriotza-tasari buruzko Euskadiko azken datuen arabera, minbizia lehen heriotza kausa da, . Gizonen kasuan, ehunekoa % 37,2raino igotzen da; emakumeen kasuan, aldiz, % 24,3koa da, eta minbizia bigarren heriotza-kausa. 2011-2015 bosturtekoari dagozkion heriotza-tasari buruzko datuen arabera, 30.273 pertsona zendu ziren, EAEn, minbiziaren ondorioz.

Jon Darpon Osasun sailburuak adierazi duenez, datozen urteotan Euskadiko Onkologia Plan Integrala abiaraziko du Osasun Sailak, gaixoei minbiziaren eragina leuntzeko.

Horren esanetan, Osasun Sailaren apustua izango da Euskadin egun indarrean dauden biztanleria bahetzeko programak hobetzea eta eguneratzea, hau da, tumore ohikoenetakoak diren kolon eta ondesteko minbizia eta bularreko minbizia bahetzeko programak. Programa horiei umetoki-lepoko minbizia bahetzeko programa gehituko zaie legegintzaldi honetan zehar, eta 21 eta 65 urte arteko emakumeei zuzenduta egongo da.