Gizartea -
Genero indarkeria
Gasteizen bere bikotekidea hil zuen gizona errudun jo du epaimahaiak
Erasotzaileak 2015eko apirilaren 2an hil zuen bere bikotekidea, dibortzioaren inguruan emakumearekin izandako eztabaida baten ostean.
Agentziak | Erredakzioa
Herri-epaimahaiak errudun jo du 2015eko apirilean bere bikotekidea hil zuela aitortu zuen gizona, eta hilketa delitua egotzi dio. Antza denez, eztabaida baten ostean hiru labankada eman zizkion emazteari.
Fiskaltzak eta gainontzeko akusazioek berretsi dutenez, bikotearen seme-alabak (10, 8 eta 2 urtekoak) etxean zeuden une horretan.
34 urteko erasotzaileak 2015eko apirilaren 2an hil zuen bere bikotekidea, dibortzioaren inguruan emakumearekin izandako eztabaida baten ostean.
Gauzak horrela, Ministerio Publikoak hilketa delitua egotzi dio eta 19 urteko kartzela-zigorra eskatu du gizonarentzat, senidetasun larrigarria gehituta, baina aitorpen aringarriarekin.
Halaber, biktimaren seme-alabei baita sendiari ere 320.000 euroko kalte-ordaina ordaintzea eskatu du.
_____________________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.
