Gizartea -
Gasteiz
2017ko Andre Maria Zuriaren jaietan ez da zezenketarik izango
Udalak deitutako lehiaketara ez da enpresa bakar bat ere aurkeztu, eta, ondorioz, datorren urtean zezenketarik ez egitea erabaki du.
AGENTZIAK | ERREDAKZIOA
Datorren urteko Gasteizko Andre Maria Zuriaren jaietan ez da zezenketarik izango, lehendabizikoz. Udalak zezenketak antolatzeko egindako deialdira ez da enpresa bakar bat ere aurkeztu, eta Gasteizko Udalak deialdi berri bat ez egitea erabaki du.
Lehiaketara enpresarik aurkeztu ez denez, Udalak hiru aukera zituen: deialdia errepikatzea, interesa izan zezaketen enpresekin negoziazioak hastea edota zezenketarik ez egitea.
EAJ eta PSE-EE buru ditu udal gobernuak hirugarren aukeraren alde egin du, eta, beraz, 2017ko Andre Maria Zuriaren jaietan ez da zezenketarik izango. Horrek programazioan utziko duen hutsuneari aurre egiteko, Blusen eta Nesken Batzordera joko dute alternatiba bila.
Blusen eta Nesken Eguneko eta abuztuaren 5etik 9ra bitarteko arratsaldeko egitaraua osatu beharko da. Gainera, zezen-plazarainoko paseoari zentzu berri bat aurkitu beharko zaio.
Blusen eta Nesken Batzordearekin hasiko dituzten elkarrizketa horietan bigantxak berreskuratu ala ez ere aztertuko dute.
