Gizartea -
Memoria Historikoa
Beiratea Nafarroako Jauregian, erramuz koroatutako gurutzearen ordez
Beirazko leihoak Nafarroako armarria izango du eta, dena ondo bidean, urtarrila bukaerarako egongo da jarrita.
Agentziak | Erredakzioa
Nafarroako Gobernuak beiratea jarriko du Nafarroako Jauregian, erramuz koroatutako gurutze frankistaren ordez, Memoria Historiakoren Foru Legea aplikatuta.
Ana Ollo Herritarrekiko eta Instituzioekiko Harremanetarako kontseilariak eta Alvaro Baraibar Bake, Bizikidetza eta Giza Eskubideetako zuzendari nagusiak azaldu dutenez, beirateak 1,40 eta 1,50 metroko zabalera izango du eta ikur frankista zegoen tokia beteko du.
Beirazko leihoa Oilteko tailer batean egingo dute eta urtarrila bukaerarako jarrita egongo dela iragarri dute. Beirateak Nafarroako armarria irudikatuko du, urrezko kateez, fondo gorriz, esmeraldarekin eta Nafarroako Erresuma sinbolizatzen duen Koroarekin.
Francisco Francok Nafarroari emandako ikurra izan zen erramuz koroatutako gurutzea, 1936ko kolpe militarrean eta ondoren gerratean lagundu zioten nafarrei esker ona adierazteko.
