Gizartea -
2015eko Aste Nagusia
11 urteko kartzela-zigorra ezarri diote bere kidea hil zuen gizonari
Hiltzaileak hamar zentimetro inguruko aiztoa hartu zuen eta pisukideari aiztokada bat eman zion. Eraso horren ondorioz, pisukidea hiru egun geroago hil zen.
Agentziak | Erredakzioa
Bilboko 2015eko Aste Nagusian haren pisukidea hil zuen 54 urteko gizonari hamaika urteko kartzela-zigorra ezarri dio Bizkaiko Probintzia Auzitegiko lehen sekzioak. Gainera, biktimaren amari 70.000 euro inguruko kalte-ordaina ematea ezarri dio hiltzaileari. Irailean, herri epaimahai batek errudun jo zuen akusatua, eta gizahilketa leporatu zion 2015eko abuztuan haren pisukideari aiztokada bat eman zion gizonari.
2015eko abuztuaren 23an jazo zen gertaera, Bilboko etxebizitza batean. Bizkaiko Probintzia Auzitegiak astearte honetan jakinarazi duen epaiaren arabera, goizalde horretan, bi pisukideak parrandan ibili ziren, elkarren beste lagun batzuekin batera.
Bi pisukideak etxean sartu ziren unean, eztabaida handia izan zuten. Dena den, frogatutzat ematen da hiltzaileak hamar zentimetro inguruko aiztoa hartu zuela sukaldetik eta pisukideari aiztokada bat eman ziola, ezkerraldean. Eraso horren ondorioz, pisukidea hiru egun geroago hil zen, abuztuaren 26an, hain zuzen ere.
Ebazpen judizialaren arabera, hiltzaileak aizto bat zuela jakinaren gainean erabili zuen besteari eraso egiteko. Gainera, biktimak “aurre egiteko edo erasoa gelditzen saiatzeko objekturik ez zuela” aprobetxatu zuen gizonak hildakoari aiztokada emateko.
Gainera, hiltzaileak hainbat edari hartu zituenez goizalde horretan, pisukideari eraso egin zion unean alkoholak nolabaiteko zerikusia izan zuela aurreikusi du Bizkaiko Probintzia Auzitegiak eman duen epaiak.