Bilbon hileta zibilak ospatzeko udalaren lokalak erabili ahalko dira

Bilboko Udal Gobernu Batzordeak, udalaren lokaletan hileta zibilak ospatzeko zerbitzua eskaintzea onartu du. Osoko Bilkurak ostailaren 25ean onartu zuenari jarraiki, eta ondoren teknikoek egin duten txostenarekin batera, asteazken honetan erabaki dute non ospatu daitezkeen hileta zibilak.

Batzordeak erabakitakoaren arabera, hiriburuaren barrutietako zentroetan eta Derioko hilerrian, erraustegiaren ondoan atonduko duten lokal batean eta estalita dagoen galerian ospatu ahalko dira.

Barrutietako zentroei deritzonez, zortzi barrutitan banatuta dauden 25 zentro erabili ahalko dira baina, zenbait baldintza ezarri dituzte: Hildakoak Bilbon erroldatuta egon behar ziren azkeneko aldiz eta, ez dira onartuko hildakoen gorpuak bertan izaterik, besteak beste.

Derioko hilerriari deritzonez, dagoeneko indarrean dagoen arautegia erabili beharko da.

Bestalde, Udalaren webgunean zerbitzu honen informazio guztia eta eskariak egiteko formularioa ere jarriko dute.