Erraustegiaren kontrako dinamikari eutsiko diote, eperik gabe

Gipuzkoo Zutik ekimenak iragarri du erraustegiaren kontrako dinamikari eperik gabe eutsiko diotela, eta Donostiako Gipuzkoa plazako kanpalekuan jarraituko dutela berretsi du.

Goizean, bigarren aldiz jarraian sartu da Ertzaintza Gipuzkoa plazan, eta protestan parte hartzen ari ziren bi gazte atxilotu ditu. Polizia-etxera eraman, eta, identifikatu eta gero, aske utzi dituzte. Alabaina, epaiketa azkarra egingo diete biei.

Erraustegiaren kontrako protesta baketsua “kriminalizatu” egin nahi dutela salatu du Gipuzkoa Zutik ekimenak.

Hala ere, mugimendu horretako kideek erraustegiaren kontrako mobilizazioekin jarraitzeko asmo irmoa erakutsi dute, eta datozen egunetan atxikimendu gehiago espero dituztela esan dute.

Arratsaldean, manifestazio jendetsua egin dute Donostiako kale nagusietan barrena, erraustegiak osasunarentzat dituen arriskuez ohartaraziz.