Gizartea -
GERTAERAK CASTEJONEN
Kaletik kendu dute txirrindulariei lepoa mintzeko jarritako kable bat
Bizikletaz paseatzen ari zen emakume batek kordoia saihestea lortu zuen. Geroago, pertsona batek Guardia Zibila jakinean jarri zuen bi kaleren artean kordoi bat lotuta zegoelako.
agentziak | erredakzioa
Guardia Zibilak Castejongo (Nafarroa) kale batean alderik alde zegoen kordoi bat kendu zuen atzo. Kordoiak bertatik igarotzen diren txirrindulariei lepoa mintzeko helburuarekin jarri zuten ustez.
Bizikletaz paseatzen ari zen emakume batek kordoia saihestea lortu zuen, abiadura motelean zebilelako, baina gertatutakoak zeharo urduritu zuen.
Geroago, pertsona batek Guardia Zibilari ohartarazi zion Castejongo Sarasate eta Principe de Viana kaleen elkargunean kordoi bat lotuta zegoela, lepoaren altueran kokatuta.
Guardia Zibilaren iturriek EFEri jakinarazi diotenez, kablea inguruko fabrika zahar baten teilatu batera lotuta zegoen. Kordoia oso luzea eta gogorra zen eta alpargatak lotzeko erabiltzen den hari mota bera zen. Agenteek kablea kentzea lortu zuten eta ez zen zauriturik izan.