Aurtengo inauteriak ere, euripean

Inauteri garaia etortzearekin bat, euritara jotzen duela dirudi. Aurten, behintzat, larunbatarekin, askorentzat egunik handienarekin, helduko dira prezipitazioak. Hala aurreikusi du behintzat Euskalmet Euskal Meteorologia Agentziak. Larunbat goiza lasaia izango bada ere, arratsalderako frontea sartuko da, eta euri-jasak utziko ditu denean. Ezin esan Bilboko, Donostiako, Gasteizko eta Tolosako inauterietako desfileak ateri egingo dituztenik; meteorologoak ez dira hori baieztatzen ausartu. "Tantaren bat bota dezake", aitortu diote eitb.eus-i. Dena dela, iragarpenaren arabera, "txarrena" egunaren azken partean etorriko da: gogotik egingo du euria.

Aratusteak giro atseginarekin abiatu dira. Ostegun Gizenean, ostarte zabalak espero dira, goi mailako hodeiak deseginda. Haizeak ekialdetik joko du, eta tenperatura fresko antzera ibiliko da: 12 ºC-ko maximoak kostaldean, eta 9 ºC ingurukoak, barnealdean.

Aldaketarik ez da espero Ostiral Meherako. Eguzkia izango da jaun eta jabe zeruan, goizeko behe-lainoa altxatuta. Hotz egingo du goizean. Eguzkia lagun, tenperaturak hiruzpalau gradu egingo du gora

Bi zati izango ditu larunbatak. Eguna hotzetik eta zeru argiekin abiatuko dugu. Haizeak hegotik joko du, zakar. Tenperaturak oso atseginak izango dira urteko sasoi honetarako: 18 gradura igoko da termometroa Bilbon, eta 10-15 ºC-ren bueltan ibiliko da barnealdean. Arratsaldean, baina, fronte bat sartuko da mendebaldetik, eta prezipitazioak utziko ditu lurralde osoan. Gauean, gogotik egingo du. Arratsalderako aurreikusita dauden desfileetan, euria egin lezake, asko izango ez bada ere.

Igandea modu bertsuan hasiko da, Euskalmeten arabera. Giro traketsa izango da nagusi; arratsalderako, ordea, atertzera egingo du. Haizeak ipar-ekialdeko ukitua izango du, eta tenperatura freskoa izango da.

Astelehen goizean, ateri eutsiko dio, baina arratsalderako prezipitazioak espero dira berriro. Halere, ez du larunbatean beste botako. Asteartean ere, giro desatsegina iragarri dute meteorologoek.

Iragarpena gorabehera, inauterizaleen esku dago giroa bero eta atsegin bihurtzea.