Osakidetzak % 4 areagotu du operazioen kopurua

Osakidetzako zuzendari nagusi Jon Etxeberria hedabideen aurrean agertu da gaur, Osasun Laguntzako zuzendari Antonio Arraiza doktorearekin batera, Osakidetzaren 2015eko jarduera-balantzea egiteko. Programatutako kirurgia-jarduerak, 2014koaren aldean, % 4ko hazkundea izan duela nabarmendu du; hau da, iaz kirurgia handiko 4.550 ebakuntza gehiago egin ziren, horietatik % 60 modu anbulatorioan.

Ildo horretan, egindako ahalegina nabarmendu du Osakidetzako zuzendari nagusiak; izan ere, "jarduera handitu arren, oraindik 50 egunekoa da" kirurgiako ebakuntza bat egiteko batez besteko itxaronaldia. Etxeberriak azaldu duenez, "horrek esan nahi du Osakidetza ezaugarritzen duten kalitate-parametroei eusten diegula oraindik: gure Hobekuntza Planak ezarritakoa baino 5 egun gutxiagokoa da itxaronaldia".

Horrez gainera, Osakidetzako arduradunek nabarmendu dute Lehen Mailako Arretan artatutako kontsultak, dela osasun-zentroetan dela etxean, % 5 gehiago izan direla; telefono bidezko kontsulten (2.317.495) hazkundea ere azpimarratu dute, lehen mailako arretan egindako guztien % 20,4 baitira jada.

Horien esanetan, antzeko bilakaera izan dute Lehen Mailako Arretako eta Arreta Espezializatuko medikuek bertaratu gabe egindako kontsultek ere. Horrelako kontsultak 64.000 inguru izan dira, 2014an baino % 31 gehiago. Harreman horren ondorioz, ebazpen kopuru handiagoa egon da Lehen Mailako Arretan, eta horrek saihestu egin ditu atzerapenak zein pazienteen alperrikako joan-etorriak.

Jardueraren balantze horretan, berariazko kapitulua izan du web bidezko hitzorduak. Lehen Mailako Arretako 1.600.000 hitzordu baino gehiago eskatu zituzten iaz 500.000 lagunek Osakidetzaren webgunearen bitartez.