Nafarroan izaten ari diren sexu ziber-jazarpen kasuez ohartarazi dute

Guardia Zibilak Nafarroan gertatzen ari diren sexu ziber-jazarpen kasuez ohartarazi du, azkenaldian horrekin lotutako hainbat salaketa jaso ostean.

Internet bidez egiten den xantaia mota bat da. Dirua eskatzen dute biktimaren sexu irudiak ez zabaltzearen truke.

Mehatxu horiek egiteko hamaika modu badaude ere, jasotako salaketetan antzeko trikimailuak erabili dituzte. Hala, emakume bat biktimarekin jarri da harremanetan Facebook bitartez. Harremanetan jarri ostean, biktimaren konfiantza irabazi du, eta azkenean Skype bidez sexu bideoak grabatzen amaitu dute.

Orokorrean, biktimak 18 eta 35 urte arteko gizonezkoak ziren, eta askotan haiek ohartu gabe grabatu zituzten, eta 500 euro inguru eskatu zizkieten bideoa ez zabaltzearren.

Guardia Zibilak web kamera estaltzea, xantaiari jaramonik ez egitea, informaziorik ez ematea, balizko frogak gordetzea, hitz gakoak aldatzea eta salaketa jartzea aholkatzen du.